Pretorianers sal dalk binnekort direk van die Wonderboom-lughawe na Kaapstad kan vlieg.
Die lugdiens CemAir het aangekondig hy oorweeg dit om ’n retoervlug na Kaapstad van dié lughawe te onderneem.
Nicolene Myburgh, woordvoerder van CemAir, wat hoofsaaklik vlugte van die O.R. Tambo-lughawe na Margate en Plettenbergbaai onderneem, het gesê ’n peiling onder sy passasiers wys daar is ’n geweldige vraag na so ’n diens.
“’n Geskeduleerde langafstandvlug kan vir enige stad van enorme ekonomiese waarde wees.
“Dus sal nie net die lugdiens daarby baat vind nie, maar ook die Tshwane-stadsraad.”
Myburgh het gesê die Wonderboom-lughawe is groot genoeg en het genoeg parkeerplek om langafstandvlugte te hanteer.
“Die enigste probleem is dat die landingstrook tans te kort is.”
Daarom sal CemAir slegs vroegoggend vlugte kan onderneem en dus nie so gereeld kan vlieg nie.
“Ons onderhandel met die Tshwane-stadsraad om die landingstrook op te gradeer.”
Volgens Kobus Lourens van die Bluechip-vliegskool by Wonderboom sal skedulevlugte die lughawe groter blootstelling gee.
“Die Wonderboom-lughawe is ’n ten volle toegeruste nasionale lughawe met lughawebestuur, ’n lugverkeertoring, brandweer en nooddienste en behoort met die nodige bestuursvernuf die ekstra verkeer te kan hanteer.”
Hy het egter gesê geskeduleerde vlugte kan sake vir studente by die vliegskool moeiliker maak omdat dié vlugte voorkeur sal kry.
Die Tshwane-metroraad het vroeër gesê hy oorweeg dit om die lughawe te privatiseer.
“Die stad voel die private sektor het makliker toegang tot die geld wat nodig is om die lughawe te ontwikkel,” het Lindela Mashigo, Tshwane-woordvoerder, gesê.
Verskeie instellings het volgens hom die raad reeds genader met die oog daarop om die lughawe te koop. “Sodra daar op ’n koper besluit is, sal dit sowat 18 tot 22 maande vat om te koopproses af te handel.”
