’n Getroude paartjie het Sondagoggend kort na middernag ternouernood aan die dood ontkom toe hulle net betyds uit hul brandende BMW 525 kon spring.
Volgens die vrou het die motor se enjin oorverhit en moes hulle noodgedwonge by die Lievland-afdraai net buite Stellenbosch stilhou. Ooggetuies wat eerste op die toneel was het gesien hoe die enjinkompartement aan die brand slaan, waarna die res van die motor in vlamme uitgebars het. Niemand is beseer nie.
Die brandweer was gou op die toneel en kon die brand blus voordat die brandstoftenk ontplof. Die paartjie was van ’n troue in die Paarl na hul huis in Somerset-Wes onderweg.
Die vrou het aan omstanders gesê sy ly erg aan skok, maar dat die motor net “van aardse waarde” is. Die polisie kon teen gistermiddag nog nie die name van die paartjie bevestig nie. ’n Houtkruis aan die oorkant van die pad het getoon dat nie almal wat al by dié afdraai in ’n ongeluk betrokke was, so gelukkig soos die twee was nie
