“Dis ek in die seks-video. En ek is bitter, bitter jammer dat ek gelieg het.
“Asseblief, vergewe my.”
Ná agt maande van heftige ontkenning het die Springbokheld Joost van der Westhuizen (38) aan Rapport erken dis hý wat sowat drie jaar gelede skelm verfilm is terwyl hy in ’n Pretoriase huis “seksuele ****ak” (soos hy dit stel) met die blonde ontkleedanseres Marilize van Emmenis (nou 24) gehad het.
In dié steelvideo snuif Joost, met net ’n onderbroek aan, ook die dwelm Cat.
Rapport het dié video onthul in dieselfde week waarin Joost en sy vrou, Amor Vittone, hul Christenskap in Vrouekeur bely het.
Van meet af aan het dié oud-Bokkaptein gesê die man in die video is iemand anders.
“Span van der Westhuizen” – met die private ondersoeker mnr. Mike Bolhuis vooraan – het dié leuen toe met mening probeer verkoop.
Daar is triomfantlik aangekondig Joost het ’n leuenverklikkertoets geslaag. Daar was dreigemente en ’n jagmakery op die videomakers.
En die publiek het aanhou twyfel of dit Joost in die video was of nie.
SuperSport het Jooste se dienste as kommentator vroeër vanjaar opgeskort, hoofsaaklik oor sy dwelmgebruik in die video.
Joost het tot in daardie stadium Maandae sy SuperRugby-program komkommerkoel aangebied – asof hy nie ’n bekommernis in die wêreld het nie.
Maar in sy boek, Spieëlbeeld, praat Joost oor die hel waardeur hy is.
“Elke oomblik van elke dag het daardie video alles in my lewe oorheers. Die feit dat ek besig was om ’n leuen te leef het my van binne opgevreet en verteer.”
Hy het ook vir Amor gelieg, het hy aan Rapport gesê.
“Sy het my mooi gevra, en ek het vir haar gejok.” Eers teen begin Augustus het Joost teenoor Amor beken. “Sy is die ongelooflikste mens. En van daar af het ons aan ons verhouding begin werk, left, right en centre.
“Tot vandag het ek myself nie eens vergewe nie. Hoe kan ek verwag sy moet my vergewe?
“Ek kan my gesin steeds verloor. Dinge is nog nie 100% met Amor nie.
“Maar ons het die hele tyd nog nie een nag in verskillende beddens of kamers geslaap nie.” ’n Egskeiding is allermins op pad, sê Joost. “Dis die grootste klomp s****t.”
In sy boek en teenoor Rapport onthul Joost ook:
;SuperSport gaan “binne dae” besluit of sy ****rak beëindig gaan word of nie. “Ek sal nie verbaas wees as hulle dit doen nie – dis die punch wat ek moet vat. SuperSport het ’n handelsmerk om te beskerm.”
;Hy, Amor en hul twee kinders het in Junie by die evangelis Angus Buchan op sy plaas by Greytown gaan kuier om raad te vra. “Oom Angus het my laat besef ek moet opstaan en die pilaar in die huisgesin wees.”
;Die video hét hom finansieel geknou, sê Joost. “Maar ek is nie uitgewipe nie, ek woon nog in dieselfde huis, het nog dieselfde werk.
“En die uitnodigings begin weer toeneem – ek tree juis Vrydagaand (eergister) op ’n manne-aand in Upington op.”
- Rapport
.
