Erika Gibson
PRETORIA. – ’n Besluit wat die lugmag se vliegtuie – insluitend BBP-vliegtuie – se diensbaarheid in die gedrang bring, het die militêre lugvaartgeledere vandeesweek soos ’n bom getref.
Altesaam 523 van Denel Lugvaart/Atlas Mannekraggroep (AMG) se vliegtuigspesialiste, wat die lugmag se vliegtuie in die lug moet hou, word deur afdanking in die gesig gestaar nadat die lugmag sy kontrak met AMG opgeskort het.
Dié besluit kom nadat die lugmag reeds verlede jaar kennis gegee het dat hy die kontrak gaan opskort en ’n plaasvervangende bedeling in die plek daarvan gaan instel.
Die onderhandelings oor die nuwe bedeling, wat van 1 April volgende jaar in werking sou tree, is egter die afgelope week eensydig deur die lugmag opgeskort.
Die lugmag en AMG se samewerking dateer uit die vroeë jare sestig.
Beide Denel en die lugmag het gister gesê die saak is nog onder bespreking. Hulle sal eers kommentaar lewer as die besprekings volvoer is.
“Daar het die afgelope 14 dae iets gebeur, maar ek weet nie wat nie. Ons was vol moed dat daar nog ’n onderhandelingsproses onderweg was en die volgende oomblik is dit beëindig,” het Jack Loggenberg, Solidariteit se nasionale organiseerder vir die metaal- en ingenieursbedryf, gister gesê.
Volgens ’n brief wat gister aan die 523 werknemers gestuur is, gaan die lugmag se besluit verreikende gevolge inhou vir sy operasionele vermoë en vliegoperasies.
Die besluit raak landwyd mense wat reeds dekades lank by die lugmag se onderskeie eskaders werksaam was.
Volgens Loggenberg beskik minstens 75% van die AMG-personeel oor skaars en kritieke vaardighede waarsonder die lugmag nie kan funksioneer nie.
Terselfdertyd is die lugmag, wat reeds weens ernstige begrotingstekorte geknel word, ingevolge die kontrak verantwoordelik vir die skeidingspakkette van miljoene rande wat aan die personeel verskaf sal moet word.
“Die personeel se vaardighede is uiters gesog omdat daar wêreldwyd ’n tekort aan vliegtuigtegnici is. Hulle gaan elders opgeslurp word en dan gaan die lugmag sonder gekwalifiseerde kundiges sit om sy vliegtuie operasioneel te hou,” het hy gesê.
Die kontrak moes vervang word omdat dit nie aan die staat se finansiële tendervereistes voldoen het nie. Die ouditeur-generaal het dit dus jaarliks in sy oudit as ’n finansiële onreëlmatigheid uitgewys. ’n Nuwe kontraktender sou uitgereik en die personeel as kundiges in die lugmag geabsorbeer moes word.
Luidens die brief het die lugmag “sy besluit hersien en besluit om nie verder met die nuwe kontrak met Denel Lugvaart/AMG voort te gaan ná 31 Maart 2013 nie.
“Sou Denel nie teen 30 November 2012 enige inligting van die lugmag kry of hy van die mense wil behou nie, moet Seksie 189 van die Wet op Arbeidsverhoudinge geaktiveer en AMG se werksmag afgedank word,” lui die brief.
“Dit is verstaanbaar dat daar tans ernstige onsekerheid, angstigheid en vrese onder ons werknemers heers. Ons probeer ons bes om met die lugmag oor alternatiewe te onderhandel.”
- Die Burger
